തിരുവനന്തപുരം: 2022ലെ കേരള സംസ്ഥാന ചലച്ചിത്ര പുരസ്കാര വിതരണം ചെയ്തു. തിരുവനന്തപുരം നിശാഗന്ധി ഓഡിറ്റോറിയത്തില് നടന്ന ചടങ്ങില് മുഖ്യമന്ത്രി പിണറായി വിജയനും സാംസ്കാരിക വകുപ്പ് മന്ത്രി സജി ചെറിയാനുമാണ് പുരസ്കാര വിതരണം നിര്വഹിച്ചത്. മികച്ച നടനുള്ള പുരസ്കാരം മമ്മൂട്ടിയ്ക്ക് വേണ്ടി നന്പകല് നേരത്ത് മയക്കം എന്ന സിനിമയുടെ സംവിധായകന് ലിജോ ജോസ് പെല്ലിശ്ശേരിയാണ് ഏറ്റുവാങ്ങിയത്.
കുഞ്ചാക്കോ ബോബന്, അലന്സിയര്, വിന്സി അലോഷ്യസ്, ലിജോ ജോസ് പെല്ലിശ്ശേരി, മഹേഷ് നാരായണന്, എം.ജയചന്ദ്രന്, റഫീക്ക് അഹമ്മദ്, രതീഷ് ബാലകൃഷ്ണ പൊതുവാള് എന്നിവരും മറ്റു പുരസ്കാര ജേതാക്കളും ചടങ്ങില് സന്നിഹിതരായിരുന്നു.
സാംസ്കാരിക വകുപ്പ് മന്ത്രി സജി ചെറിയാന് അധ്യക്ഷത വഹിച്ച ചടങ്ങില് ഭക്ഷ്യ, സിവില് സപൈ്ളസ് വകുപ്പ് മന്ത്രി ജി.ആര്. അനില് അനുമോദന പ്രഭാഷണം നടത്തി. വി കെ. പ്രശാന്ത് എംഎല്എ, മേയര് ആര്യ രാജേന്ദ്രന്, ജില്ലാ പഞ്ചായത്ത് പ്രസിഡന്റ് ഡി സുരേഷ് കുമാര്, ജൂറി ചെയര്മാന് ഗൗതം ഘോഷ്, രചനാവിഭാഗം ജൂറി ചെയര്മാന് കെ.സി. നാരായണന്, കെഎസ്എഫ്ഡിസി ചെയര്മാന് ഷാജി എന്. കരുണ്, സാംസ്കാരിക പ്രവര്ത്തക ക്ഷേമനിധി ബോര്ഡ് ചെയര്മാന് മധുപാല്, സാംസ്കാരിക വകുപ്പ് സെക്രട്ടറി മിനി ആന്റണി ഐഎഎസ്, ചലച്ചിത്ര അക്കാദമി ചെയര്മാന് രഞ്ജിത്, വൈസ് ചെയര്മാന് പ്രേംകുമാര്, സെക്രട്ടറി സി. അജോയ് എന്നിവര് പങ്കെടുത്തു.
