തിരുവനന്തപുരം: നവകേരള സദസിനെതിരെ പ്രതിപക്ഷനേതാവ് വി.ഡി. സതീശന്. കേരളത്തിന്റെ ഭയാനക സാമ്പത്തിക പ്രതിസന്ധിയും ലക്ഷക്കണക്കിന് വരുന്ന സാധാരണക്കാരും കേരള ജനത ഒന്നാകെയും അഭിമുഖീകരിക്കുന്ന ജീവല് പ്രശ്നങ്ങളും പരിഹരിക്കാത്ത സര്ക്കാര്, നവകേരള സദസില് എന്ത് ജനകീയ പ്രശ്നങ്ങളാണ് പരിഗണിക്കുകയെന്ന് വി.ഡി. സതീശന്. 52 ലക്ഷം പേര്ക്ക് നാലുമാസത്തെ ക്ഷേമ പെന്ഷന് കുടിശികയാണ്. നിരാലംബരായ അവര് മരുന്ന് വാങ്ങാന് പോലും പണമില്ലാതെ കഷ്ടപ്പെടുകയാണ്. ഇവരുടെ പ്രശ്നങ്ങള് എന്ന് പരിഹരിക്കുമെന്നും പ്രതിപക്ഷനേതാവ് ചോദിച്ചു.
‘കര്ഷകരെല്ലാം കടുത്ത പ്രതിസന്ധിയിലാണ്. പി.ആര്.എസ് വായ്പ നെല് കര്ഷകന് തീരാബാധ്യതയായിരിക്കുന്നു. നാളികേര കര്ഷകര് അവഗണന നേരിടുകയാണ്. റബ്ബര് കര്ഷന്റെ 250 രൂപ താങ്ങുവില എവിടെ? ലൈഫ് പദ്ധതിയില് വീട് ലഭിക്കാനായി ഒമ്പതുലക്ഷം പേര് കാത്തിരിക്കുകയാണ്. വീട് ലഭിക്കുമെന്ന ഉറപ്പില് നിരവധി പേരാണ് കുടിലുകള് പൊളിച്ചു മാറ്റി മാസങ്ങളായി പെരുവഴിയിലായത്. ശൗചാലയം പോലും ഇല്ലാത്ത നിരവധി പേരുടെ ദുരവസ്ഥ നമ്മള് കണ്ടതാണ്. വിലക്കയറ്റത്തില് ആശ്വാസമാകേണ്ട സപ്ലൈകോ വെന്റിലേറ്ററിലാണ്. മാവേലി സ്റ്റോറുകളില് സബ്സിഡി സാധനങ്ങള് എന്ന് എത്തിക്കും?’, സതീശന് ചോദിച്ചു.
പാവപ്പെട്ട നിരവധി രോഗികളാണ് കാര്യണ്യ പദ്ധതിയുടെ കാരുണ്യം കാത്ത് നില്ക്കുന്നത്. മുഖ്യമന്ത്രിയും സംഘവും ഒന്നര കോടിയുടെ ആഡംബര ബസില് സഞ്ചരിക്കുമ്പോള് പാവപ്പെട്ട കെ.എസ്.ആര്.ടി.സി ജീവനക്കാരന്റെ പെന്ഷനും ശമ്പളവും ആര് നല്കും? സാധാരണക്കാരന്റെ നെഞ്ചില് ചവിട്ടിയാണ് മുഖ്യമന്ത്രിയുടെയും മന്ത്രിമാരുടെയും ആഡംബരയാത്ര. ആഡംബര ബസിലെ കറങ്ങുന്ന കസേരയില് രാജാവിനെ പോലെ ഇരിക്കുന്ന മുഖ്യമന്ത്രിയെ സാധാരണക്കാര് തൊഴുത് വണങ്ങി നില്ക്കണമെന്നാണോ ഉദ്ദേശിക്കുന്നതെന്നും പ്രതിപക്ഷനേതാവ് വിമര്ശിച്ചു.
