തിരുവനന്തപുരം : ഉമ്മൻചാണ്ടി സര്ക്കാരിന്റെ കാലത്ത് നടന്ന എസ്.എഫ്.ഐയുടെ വിദ്യാഭ്യാസ സമരവുമായി ബന്ധപ്പെട്ട കേസിൽ എഎം റഹിം എംപിക്കും എ സ്വരാജിനും തടവും പിഴയും. ഒരു വര്ഷം തടവും 5000 രൂപ പിഴയുമാണ് ശിക്ഷ. തിരുവനന്തപുരം ജ്യൂഡീഷ്യല് മജിസ്ട്രേറ്റ് കോടതിയാണ് ശിക്ഷ വിധിച്ചത്. കേസില് ഇരുവരും കുറ്റക്കാരാണെന്ന് കോടതി കണ്ടെത്തിയിരുന്നു. ഇതിനു പിന്നാലെയാണ് ഇരുവര്ക്കും ശിക്ഷ വിധിച്ചത്.
2010ല് ഉമ്മന് ചാണ്ടി സര്ക്കാരിന്റെ വിദ്യാഭ്യാസനയങ്ങള്ക്കെതിരെ എസ്എഫ്ഐ നടത്തിയ നിയമസഭാ മാര്ച്ചുമായി ബന്ധപ്പെട്ട കേസിലാണ് കോടതി നടപടി. പൊലീസിന്റെ കൃത്യനിര്വഹണം തടസ്സപ്പെടുത്തി, നിയമവിരുദ്ധമായി കൂട്ടംകൂടി തുടങ്ങിയവകുപ്പുകളിലാണ് ശിക്ഷ.
