വയനാട്: മുണ്ടക്കൈ ചൂരല്മല ഉരുള്പൊട്ടലില് കാണാതായവര്ക്കുള്ള ജനകീയ തിരച്ചില് ഇന്ന് അവസാനിപ്പിക്കും. ഇനിമുതല് ആവശ്യാനുസരണം ഉള്ള തിരച്ചില് ആയിരിക്കും നടക്കുക. ഇതിനായി വിവിധ സേനാംഗങ്ങള് തുടരും. ചാലിയാറിലും ദുരന്തം ഉണ്ടായ പ്രദേശത്തും ഇന്നലെ നടത്തിയ തിരച്ചിലിലും മൃതദേഹങ്ങളോ ശരീര ഭാഗങ്ങളോ കണ്ടെത്താനായിരുന്നില്ല.
അതേസമയം ഭൗമശാസ്ത്രജ്ഞന് ജോണ് മത്തായി നേതൃത്വത്തിലുള്ള വിദഗ്ധ സംഘത്തിന്റെ പരിശോധന ഇന്ന് ഭാഗികമായി നിര്ത്തും. ലഭിച്ച വിവരങ്ങള് ക്രോഡീകരിച്ച ശേഷം ആയിരിക്കും തുടര് പരിശോധനകള്. ബാങ്കുകളുമായി ബന്ധപ്പെട്ട രേഖകള് വീണ്ടെടുക്കുന്നതിന് ഇന്ന് മേപ്പാടിയില് പ്രത്യേക അദാലത്ത് സംഘടിപ്പിച്ചിട്ടുണ്ട്.
