തിരുവനന്തപുരം: സ്കൂളുകളില് സൂംബ ഡാൻസ് പരിശീലിപ്പിക്കാനുള്ള സംസ്ഥാന സര്ക്കാര് തീരുമാനത്തിനെതിരെ പ്രതിഷേധം. സൂംബ പരിശീലനം നല്കുന്നതിനെ എതിര്ത്ത് കൂടുതല് മുസ്ലീം സംഘടനകള് രംഗത്തെത്തി. സമസ്ത കേരള ജംഇയ്യത്തുല് ഉലമ യുവജന സംഘടനയായ എസ് വൈഎസ് ആണ് ഏറ്റവും ഒടുവില് വിമര്ശനം ഉയര്ത്തിയിരിക്കുന്നത്. സൂംബ ധാര്മികതയ്ക്ക് ക്ഷതമേല്പ്പിക്കുന്നതാണ് എന്ന് എസ് വൈ എസ് നേതാവ് അബ്ദുല് സമദ് പൂക്കോട്ടൂര് ആരോപിച്ചു.
ലഹരി വിരുദ്ധ ദിനാചരണത്തിന്റെ ഭാഗമായി സ്കൂളുകളില് സൂംബ നടപ്പാക്കാനുള്ള സര്ക്കാര് തീരുമാനത്തിനെതിരെ വിസ്ഡം ഇസ്ലാമിക് ഓര്ഗനൈസേഷന് ജനറല് സെക്രട്ടറി ടി കെ അഷറഫ് വിമര്ശനം ഉന്നയിച്ചതോടെയാണ് വിഷയം സജീവ ചര്ച്ചയായത്. ടി കെ അഷറഫിനെ പിന്തുണയ്ച്ചും എതിര്ത്തും നിരവധി പേര് സോഷ്യല് മീഡിയയില് പ്രതികരിച്ചിരുന്നു. പിന്നാലെയാണ് കൂടുതല് സമുദായ സംഘടനങ്ങള് പ്രതിഷേധ സ്വരം ഉയര്ത്തുന്നത്.
