കാസര്കോട്: ജനനേന്ദ്രിയത്തില് മെറ്റല് നട്ട് കുടുങ്ങിയ 46കാരന് രക്ഷയായി ഫയര്ഫോഴ്സ്. ലൈംഗികാവയവത്തില് കുടുങ്ങിയ നട്ട് ഊരിയെടുക്കാനായി രണ്ട് ദിവസത്തോളം സ്വയം ശ്രമിച്ചിട്ടും പറ്റാതായതോടെ ഇയാള് ആദ്യം ആശുപത്രിയെ സമീപിച്ചു. എന്നിട്ടും രക്ഷയില്ലാതെ വന്നതോടെ ഫയര്ഫോഴ്സിന്റെ സഹായം തേടുകയായിരുന്നു. ഫയര്ഫോഴ്സ് ഉദ്യോഗസ്ഥര് കട്ടര് ഉപയോഗിച്ച് ഒന്നര മണിക്കൂറോളം നീണ്ട പരിശ്രമത്തിനൊടുവിലാണ് നട്ട് മുറിച്ചുനീക്കിയത്.
കാഞ്ഞങ്ങാടാണ് സംഭവം. വാഷറിനും മറ്റും ഉപയോഗിക്കുന്ന ഒന്നര ഇഞ്ചോളം വ്യാസമുള്ള നട്ടാണ് 46കാരന്റെ ജനനേന്ദ്രിയത്തില് കുടുങ്ങിയത്. ചൊവ്വാഴ്ച രാത്രി എട്ട് മണിയോടെയാണ് ഇയാള് ചികിത്സ തേടി കാഞ്ഞങ്ങാട് ജില്ലാ ആശുപത്രിയില് എത്തിയത്.
നട്ട് നീക്കം ചെയ്യാന് ആശുപത്രിയില് നടത്തിയ ശ്രമങ്ങള് ഫലിച്ചില്ല. അവിടുത്തെ ഡോക്ടര് ആണ് ഫയര്ഫോഴ്സിനെ വിവരമറിയിച്ചത്. അഗ്നിരക്ഷാ സേനാംഗങ്ങള് കട്ടര് ഉപയോഗിച്ച് ഒന്നര മണിക്കൂറോളം നീണ്ട പരിശ്രമത്തിനൊടുവിലാണ് അര്ധ രാത്രിയോടെ നട്ട് മുറിച്ചുനീക്കിയത്. മദ്യലഹരിയില് ബോധമില്ലാതിരുന്നപ്പോള് അജ്ഞാതരാണ് നട്ട് കയറ്റിയതെന്നാണ് യുവാവ് പറയുന്നത്.
