തിരുവനന്തപുരം: യൂണിവേഴ്സിറ്റി കോളേജില് ഭിന്നശേഷിക്കാരനായ വിദ്യാര്ത്ഥിയെ സഹപാഠികള് മര്ദ്ദിച്ച സംഭവത്തില് നടപടി. സംഭവത്തില് ഫലപ്രദമായ അന്വേഷണം നടത്തി ജില്ലാ പോലീസ് മേധാവി ഒരു മാസത്തിനകം റിപ്പോര്ട്ട് സമര്പ്പിക്കണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ് പറഞ്ഞു.
മര്ദ്ദനത്തിന് ഇരയായ വിദ്യാര്ത്ഥിയുടെ മൊഴിരേഖപ്പെടുത്തണമെന്നും പരാതിയിലുള്ള സംഭവങ്ങളെ കുറിച്ച് വ്യക്തമായ ഒരു ചിത്രം റിപ്പോര്ട്ടിലുണ്ടാകണമെന്നും കമ്മീഷന് നിര്ദ്ദേശിച്ചു. വിദ്യാര്ത്ഥിയുടെ ആരോപണങ്ങളെക്കുറിച്ച് വസ്തുനിഷ്ഠമായ അന്വേഷണം നടത്തി കോളേജ് വിദ്യാഭ്യാസ ഡയറക്ടര് ഒരു മാസത്തിനകം റിപ്പോര്ട്ട് സമര്പ്പിക്കണം.
ജില്ലാ പോലീസ് മേധാവിയും കോളേജ് വിദ്യാഭ്യാസ ഡയറക്ടറും നിയോഗിക്കുന്ന രണ്ടു മുതിര്ന്ന ഉദ്യോഗസ്ഥര് ജനുവരി 14 ന് രാവിലെ 10 ന് കേസ് പരിഗണനക്കെടുക്കുമ്പോള് കമ്മീഷന് ഓഫീസില് നേരിട്ട് ഹാജരാകണമെന്നും ജസ്റ്റിസ് അലക്സാണ്ടര് തോമസ് നിര്ദ്ദേശിച്ചു. മര്ദ്ദനമേറ്റ പുനലാല് സ്വദേശിയായ വിദ്യാര്ത്ഥി സമര്പ്പിച്ച പരാതിയിലാണ് നടപടി.
