കോട്ടയം: കോട്ടയം മെഡിക്കല് കോളജില് കെട്ടിടം തകര്ന്ന് വീണ് ഒരാള് മരിച്ച സംഭവത്തില് ആരോഗ്യ മന്ത്രിയുടെ രാജി ആവശ്യപ്പെട്ടുള്ള പ്രതിഷേധങ്ങള് തള്ളി മന്ത്രി വി എന് വാസവന്. തകര്ന്ന കെട്ടിടം മന്ത്രി വന്ന് ഉരുട്ടിയിട്ടതാണോ എന്ന ചോദ്യം ഉയര്ത്തിയായിരുന്നു മന്ത്രി വാസവന്റെ പ്രതികരണം.
”അപകടം ഉണ്ടായതിന്റെ പേരില് മന്ത്രി രാജി വയ്ക്കണം എന്നുണ്ടോ. കര്ണാടകയില് ക്രിക്കറ്റ് താരങ്ങള് വന്നപ്പോള് അപകടം ഉണ്ടായി. അന്ന് ആരെങ്കിലും ആരുടെയെങ്കിലും രാജി ആവശ്യപ്പെട്ടിരുന്നോ. വിമാന അപകടം നടന്നാല് പ്രധാനമന്ത്രി രാജി വയ്ക്കണം എന്നാണോ”- എന്നും മന്ത്രി വി എന് വാസവന് ചോദിച്ചു.
കോട്ടയം മെഡിക്കല് കോളജ് അപകടത്തില് സര്ക്കാരിന് എതിരെ പ്രതിപക്ഷ സംഘടനകളുടെ പ്രതിഷേധം സംസ്ഥാന വ്യാപകമായി ശക്തമാകുകയാണ്. അങ്കമാലിയില് മന്ത്രി വി എന് വാസവനെതിരെയും പ്രതിഷേധം അരങ്ങേറി. അങ്കമാലിയില് വച്ച് യൂത്ത് കോണ്ഗ്രസ് പ്രവര്ത്തകര് മന്ത്രിയെ കരിങ്കൊടി കാട്ടി. ആരോഗ്യമന്ത്രിക്ക് എതിരായ പ്രതിഷേധങ്ങളുടെ ഭാഗമായി വിവിധ ജില്ലകളില് ഡിഎംഒ ഓഫീസിലേക്ക് ഉള്പ്പെടെ പ്രതിപക്ഷ സംഘടനകള് മാര്ച്ച് നടത്തിയിരുന്നു.
