തൃശൂര്: തമിഴ്നാട്ടിലെ ‘അബി’ പുളിപൊടി മിഠായിയുടെ പൊതിയില് ഇനി നടന് വിജയ്യുടെ ചിത്രം ഉണ്ടാകില്ല. പുളിയും മധുരവും കലര്ന്ന രുചിയിലൂടെ കേരളത്തിലും തമിഴ്നാട്ടിലും ഏറെ ജനപ്രീതി നേടിയ ഈ മിഠായിയുടെ പുതിയ പാക്കറ്റുകളിലാണ് മാറ്റം വന്നിരിക്കുന്നത്.
വര്ഷങ്ങളായി അബി പുളിപൊടി മിഠായി തിരിച്ചറിഞ്ഞിരുന്നത് പാക്കറ്റിലെ വിജയ്യുടെ ചിത്രം വഴിയായിരുന്നു. കടകളില് മിഠായി വാങ്ങാനെത്തുന്ന കുട്ടികള്ക്കും ആരാധകര്ക്കും അത് കൗതുകവും അടുപ്പവും സൃഷ്ടിച്ചിരുന്നു. എന്നാല് സിനിമയില്നിന്ന് മാറി രാഷ്ട്രീയരംഗത്ത് സജീവമായ വിജയ് തമിഴ്നാട്ടിന്റെ മുഖ്യമന്ത്രിയായി ചുമതലയേറ്റ സാഹചര്യത്തില് അദ്ദേഹത്തിന്റെ ചിത്രം ഇനി ഉല്പ്പന്നത്തിന്റെ പാക്കറ്റില് ഉപയോഗിക്കാതിരിക്കാൻ കമ്പനി തീരുമാനിച്ചെന്നാണ് വിവരം.
കേരളത്തിലെ നിരവധി കടകളില് പുതിയ പാക്കറ്റുകള് എത്തിത്തുടങ്ങിയിട്ടുണ്ട്. പഴയ കവര് കണ്ടുപരിചയമുള്ളവര്ക്ക് പുതിയ രൂപം ആദ്യം അപരിചിതമായി തോന്നുന്നുണ്ടെങ്കിലും മിഠായിയുടെ രുചിയില് മാറ്റമില്ലെന്ന് വ്യാപാരികള് പറയുന്നു. ഇപ്പോഴും ഒരു രൂപ തന്നെയാണ് വില.
